Mieliestronk: Geskiedenis van Afrika

 HOOFSTUK 4
Die Arabiese inval in Noord-Afrika en gevolglike ontwikkelings voor die Europese kolonisasie van die vasteland

MET die Arabiese inval in Noord-Afrika in die sewende eeu ná die geboorte van Christus, het die Islamitiese godsdiens vinnig oor die gebied versprei. Uiteindelik was daar ’n sterk Moslem-teenwoordigheid in Wes-Afrika.

Met die aankoms van Arabiese karavane is Wes-Afrika, het netwerke ontstaan waarby baie plaaslike Ystertydse gemeenskappe betrek is, waardeur groot stedelike sentrums tot stand gekom het met gesentraliseerde poitieke magte om die handel te reguleer en beheer.

Teen die middel van die agtste eeu was daar ’n magtige koninkryk genaamd Ghana (in die teenswoordige Oos-Senegal, Suidoos-Mauritanië en Suidwes-Mali, en nie te verwar met die huidige staat Ghana nie). Die destydse Ghana het die handel tussen die goudproduserende gebied Guinee en die kameelkaravane gereguleer.

Die staat Mali het in die twaalfde en dertiende eeu die beheer oorgeneem en ’n wesenlike deel van Wes-Afrika beheer. Teen die sestiende eeu het die Moslem-staat die Songhai-ryk die septer geswaai.

Nog ’n rolspeler in die Wes-Afrikaanse handel was die koninkryk van Benin in Nigerië, wat tot ’n magtige stad ontwikkel het teen die tyd toe die Portugese dit die eerste keer in die vyftiende eeu besoek het. In die florende koninkryk van Benin (nou ’n deel van Nigerië) het die bekende wasgiet-tradisie ontstaan vir die giet van brons- en geelkopervoorwerpe, asook voortreflike ivoorsnywerke, soos die een REGS. Dit is ’n dubbelklok wat in plegtighede gebruik is en verteenwoordig ’n koning van Benin en sy gevolg.

In Ife, die sentrum van die magtige Yoruba in Suidwes-Nigerië, het ook besondere kunswerke in terracotta ontstaan en ander wat deur middel van die wasgietsproses in ’n bronsagtige koperallooi gegiet is.

LINKS: ’n Bronsluiperd van nagenoeg 40 cm hoog wat in die laat sestiende of vroeë sewentiende eeu in die destydse koninkryk van Benin gegiet is.

JY is nou by HOOFSTUK 4
Klik hieronder op die hoofstuk waarheen jy vervolgens wil beweeg:

HOOFSTUK 1: Historiese rekonstruksie: die verskillende middele wat deur historici gebruik word om die veelbewoë geskiedenis van ons vasteland na te speur

HOOFSTUK 2: Die voorgeskiedenis van ons kontinent en die uiteindelike swart verskuiwing na die suide

HOOFSTUK 3: Afrika-beskawings van weleer

HOOFSTUK 5: Slawerny, die koloniale tydperk—en uiteindelik die era van onafhanklikheid

Klik hier om terug te keer na die inhoudsblad van hierdie CD-ROM