Mediese wêreld

Atleetvoet en migraine
— wenke wat werk

Met voetskimmel saamleef? Se voet!

"EK HET atleetvoet gekry toe ek ’n onhigiëniese warmbad besoek het," vertel ’n bekende Suid-Afrikaanse geleerde wat nie sy naam genoem wil hê nie. "Ek het allerhande rate beproef, maar nou, jare later, is dinge steeds nie pluis sover dit my voete aangaan nie."

Rate teen atleetvoet, ook voetskimmel genoem, is werklik legio. Vra maar ’n bietjie rond, en jy hoor van sulke uiteenlopende boeremedisynes soos koeksoda-pasta of verdunde asyn of louwarm water waarin stukke pypkaneel opgekook was.

Of van vreemde preparate wat uit woestynkaktus gemaak is of gesuspendeerde mikro-deeltjies van silwer in gedistilleerde water.

Geen wonder sekere mense sê lakonies "se voet" en lewe dan maar stoïsyns met hul jeukende voete saam nie!

Maar niemand hoef atleetvoet of voetskimmel só gelate te aanvaar nie. Daar is goeie anti-swammiddels op die mark en met die regte behandeling behoort dié voetsiekte sommer gou-gou die nekslag te kry.

Glo dit as jy wil, die meeste mense word minstens een keer in hul lewe deur atleetvoet getreiter. Soos die naam voetskimmel aandui, is dit in der waarheid ’n skimmel of swam (nes die muf op brood of die paddastoele in jou tuin) wat hom in die klamte van jou geskoende voete kan tuis maak.

Onder ’n mikroskoop sal ’n mens kan sien hoe die swam se wortels in die vel ingroei, verduidelik ’n voetdokter. Hierdie wortels is irriterend. Die swam het water nodig en die wortels suig dus die vog uit die vel. Dit is waarom die vel so droog en gebars lyk.

Atleetvoet kan wel verskillende mense verskillend affekteer. By sekeres bars die vel tussen die tone, by andere is daar ’n rooiigheid en selfs blase op die sole en langs die kante van die voete. Hierdie velveranderings kan met ’n gejeuk gepaard gaan.

Maar alle uitslae op die voete is nie atleetvoet nie. Dit is waarom dit belangrik kan wees om eers ’n spesialis te raadpleeg wat die toestand kan diagnoseer en die regte medikasie kan voorskryf. Om middels wat jy oor die toonbank gekoop het te gebruik vir ’n uitslag wat nie voetskimmel is nie, kan dalk die toestand vererger. As atleetvoet nie behandel word nie, kan die barste tot bakteriële infeksies lei.

Nog kennerswenke oor die behandeling is:

•   Hou jou voete droog. Droog hulle deeglik af sodra jy uit die bad of stort kom.

•   Mans moet twee keer per dag skoon sokkies aantrek. Wend talkpoeier aan.

•   Gebruik goeie preparate wat jy by jou apteker kan koop en volg die instruksies getrou.

•   Behandel jou skoene. As hulle sleg ruik, gooi hulle weg. Daar's swamme daarbinne. As die skoene nie sleg ruik nie, gebruik ’n goeie doelmatige sproei of gooi motballetjies in die skoene en hou hulle oornag in ’n verseëlde plastieksak.

Migraine: gemmerbier teen die naarheid

Foto ter illustrasie met vergunning van www.freeimages.co.uk

DIT kan met vonkies lig in die gesigsveld begin—en ’n verskriklike, verblindende pyn word wat selfs tot twee dae lank kan aansleep. Naarheid, vomering en ’n gevoeligheid vir lig en geraas kan alles deel van die aanval wees.  

Net een migrainelyer, word gesê, kan werklik besef wat ’n ander migrainelyer moet deurmaak.

Dalk het jy self al geleer wat die beste manier is om jou migraine te beheer. Jou dokter het gehelp deur vir jou medisyne voor te skryf, jy het sekere roetines vir slaap, eet en oefeninge uitgewerk en jy probeer maar gereeld om daardie dinge te vermy wat die aanvalle kan aanbring.

Dog die ongelukkige waarheid omtrent dié sogenaamde skeelhoofpyn is dat daar geen geneesmiddel is nie. Jou beste planne kan eenvoudig nie verhinder dat vyand migraine af en toe weer sy aaklige opwagting maak nie.

Wanneer ’n aanval kom en diegene na aan jou die simptome raaksien, maak seker dat hulle jou behoefte aan spesiale aandag begryp. Vra jou vriende en gesinslede om ’n paar uur lank jou verantwoordelikhede oor te neem en dat hulle naby jou moet bly net ingeval jou aanval baie erg is.

Moenie die simptome van ’n dreigende aanval ignoreer nie. Navorsing dui daarop dat jou maag ure voor ’n aanval ophou om behoorlik te funksioneer en minder in staat raak om medisyne op te neem. Medisyne wat deur jou dokter voorgeskryf is, moet dus so gou moontlik tydens die aanval gesluk word.

Daar is maniere waarop jy ’n hewige aanval kan afweer of, indien nie, dan wel verlig. Jy kan jouself ook gemakliker laat voel. Soek vir eers ’n stil, donker vertrek waar jy kan gaan Iê, en gebruik ’n kussing om jou kop so effens te lig.

Slaap bly die beste manier om deur ’n aanval te kom. Dié wat gelukkig is, sal wakker word en vind dat die migraine verdwyn het.

Jy kan ook vind dat ’n koue waslap vertroosting bied wanneer jy dit teen jou slape, voorkop of teen die agterkant van jou nek hou.

Maar waar koue vir baie mense help, verkies ander weer hitte en nog ander vind dit selfs nuttig om hul hande en voete met byvoorbeeld warm water te verhit. Tydens ’n aanval raak die hande en voete dikwels koud, maar deur dit te verwarm, kan oortollige bloed uit die kop uit weggelei word.

Jy sal egter beter voel deur bloot stil te lê. Vermy dus daardie skielike besoeke aan die badkamer—indien jy moet vomeer—deur ’n emmer en vars water byderhand te hou.

Party lyers verkies dit om in die badkamer te bly en vind dat ’n warm bad gespanne spiere laat ontspan en die toevloei van bloed na die kop verminder.

Sommige reken selfs dat dit help om te eet of te drink. Slukkies koue water of tee kan verligting bring. Sekere lyers wie se aanvalle nie deur kafeïen aangebring word nie, is oortuig daarvan dat ’n sterk koppie koffie hulle help. Dié kan moontlik geswole bloedvate laat saamtrek en die leegmaak van die maag verhaas. Tee of gemmerbier kan ook naarheid teëwerk.

Elke migrianelyer is anders en daarom is dit belangrik om verskillende rate te beproef om vas te stel wat vir jou sal help. Party ouers vertel dat hulle dikwels ’n doek op hul voorkop plaas net sodat hul kinders kan sien dat hulle pyn het en hulle dus met ’n bietjie stilte sal beloon.

Klik hier om terug te keer na die inhoudsblad