’n Laslappie van Mieliestronk

CHURCHILL, SIR WINSTON:

“Bulldog” van die Britse politiek

 

Sir Winston ChurchillSIR WINSTON CHURCHILL (1874-1965) [REGS] was Brittanje se grootste moderne staatsman. Hy het sy loopbaan in die leër en as oorlogskorrespondent begin en is tydens die Anglo-Boereoorlog in Suid-Afrika deur die Boere gevang, maar het in Pretoria uit sy gevangenskap ontsnap. Daarna het hy dekades lank sy land gedien as parlementslid, minister van finansies en minister van oorlog, onder meer.

 

Gesoek: die voortvlugtige Churchill LINKS: Die Boere loof 25 pond uit vir die vangs, “levend of dood”, van die ontsnapte Churchill. Dit was baie geld in daardie dae.

REGS: Churchill soos hy destyds (omstreeks 1900) gelyk het.

Foto’s: U.S. Library of Congress

Churchill omstreeks 1900

 

Churchill het in 1940 die premier van ’n koalisieregering in Brittanje geword. In die Tweede Wêreldoorlog het hy ’n simbool geword van sy land se wil om die Duitse aanslag af te weer en hy het nooit getwyfel dat die Britte die oorlog sou wen nie. Churchill se V- teken (vir ''victory'') was beroemd.

 

V-tekenLINKS: Die oorwinningsteken (V vir "victory") word gemaak deur die wysvinger en middelvinger in die vorm van ’n V omhoog te hou.

 

Hy het op ’n kritieke tydstip eerste minister geword en daarna sy land nuwe hoop en krag gegee. Die Duitse aanvalle is afgeslaan.

 

Hy was ook die skrywer van etlike geskiedkundige werke, waaronder ’n versameling essays onder die titel The Second World War, waarvoor hy in 1953 die Nobelprys vir letterkunde ontvang het.

  

  Groot Drie

BO: Die Geallieerdes se sogenaamde Groot Drie in die Tweede Wêreldoorlog. Van links is Josef Stalin van die Sowjet-unie, Amerika se Franklin D. Roosevelt en Brittanje se Churchill.

Foto: U.S. Library of Congress

Ná die Tweede Wêreldoorlog het Churchill die leier van die opposisie in die Britse parlement geword. In ’n toespraak in ’n stad genaamd Fulton in Amerika het hy sy teorieë uitgespel oor hoekom die ekspansionisme van die Sowjet-unie gestuit moes word. Dit het bygedra tot die begin van die sogenaamde Koue Oorlog, ’n lang tydperk van groot spanning tussen die Sowjet-unie en Amerika.

 

Churchill het weer Britse premier geword en van 1951 tot 1995 in dié amp gedien. Ná sy uittrede was hy weer ’n gewone parlementslid.

Clementine en Winston, 1908Sy ‘darling Clementine’

REGS: Churchill en sy verloofde, Clementine Hozier, in 1908 afge-neem ’n week voordat sy mev. Churchill geword het. Van toe af het hulle, soos hy in sy boek My Early Life geskryf het, "vir altyd gelukkig saamgelewe". Hoewel hy dit reeds in 1930 geskryf, sou dié stelling  die toets van die tyd deurstaan. Wat meer sê, die gerespekteerde Lon-dense koerant The Times het in 1965 in huldelyk ná sy dood geskryf: "Lady Churchill het by tallose geleenthede grasie en harmonie tot sir Winston Churchill se openbare lewe toegevoeg en vir hom ’n geborge en gelukkige tuiste by Chartwell geskep." Chartwell was hul plattelandse huis in die graafskap Kent in Suidoos-Engeland. Vier kinders is uit Winston en Clementine se huwelik gebore.

Foto: U.S. Library of Congress

Klik hier om terug te keer na die Laslappie-bladwyser

Klik hier om terug te keer na die inhoudsblad