|
’n Laslappie van Mieliestronk |
GROENTE:Noodsaaklik vir gesonde groei
Foto: USDA
IN
die somer word groente in tuine en landerye gekweek. Dié wat egter in
kweekhuise gekweek word, word regdeur die jaar benut. Groente
bevat groot hoeveelhede vitamiene en minerale, wat noodsaaklik is vir
gesonde groei. Dis wensliker om groente rou te eet, omdat baie van die
voedingstowwe in die gaarmaakproses verlore gaan.
Uie
is knolle wat onder die grond groei. Hulle bevat olie wat die oë irriteer
wanneer dit verdamp. Dis waarom ons ''huil'' wanneer ons uie sny.
Die
eierplant, wat inheems is in Asië, het ’n pers, bleekgroen of wit skil. Teenoor
die groot groen, geel en rooi soetrissies, kry ons ook die klein rooi of
groen brandrissies. Spinasie
bevat yster, wat baie belangrik is vir die bloedselle. Geelwortels is ryk aan vitamien A. |
REGS:
Groente... net ’n paar van die talle soorte.
Boontjies,
ertjies en lensies is peulgewasse wat baie plantaardige proteïene bevat.
Hulle vorm ’n belangrike deel van die dieet van vegetariërs (mense wat
nie vleis eet nie).
Aartappels
en tamaties is altwee inheems in Suid- Amerika. Die aartappelknol is ’n
styselryke, vlesige, ondergrondse stingel. Die tamatie word wyd gekweek
vir sy vlesige vrug, wat gewoonlik rooi is.
Pampoene,
murgpampoene en skorsies is groentesoorte wat in ’n groot verskeidenheid
aangetref word. Die plante rank op die grond langs en die vrugte groei aan
die ranke.