Laslappie

KWIK:
Die voor- en nadele van hierdie uitsonderlike metaal wat by gewone temperature
vloeibaar is

BO: Kwik is ’n silweragtige metaal, swaar maar vloeibaar by gewone temperatuur. Dit is fassinerend om te sien hoe ’n bietjie daarvan in plassies en bobbeltjies verdeel as dit op ’n plat oppervlak uitgegiet word.

Foto links bo van kwik in die openbare domein geplaas deur die eienaar; foto regs bo van kwik: U.S. Environmental Protection Agency (EPA); altwee foto’s ietwat gewysig

 Voordele van kwik:

1) Kwik word in termometers gebruik vanweë sy egalige uitsetting by verhitting en ewe egalige inkrimping by verkoeling—die verandering in die kwik se volume vir elke graad wat die temperatuur styg of daal, is dieselfde.

2) Kwik word ook in ander soorte wetenskaplike apparate gebruik, byvoorbeeld vakuümpompe, barometers en elektriese skakelaars.

3) Kwikdamp-lampe is ’n bron van ultravioletstrale en word onder meer vir die sterilisasie van water gebruik.

4) Kwikdamp word pleks van stoom in die ketels van sekere turbine-enjins ingespan.

5) Kwik vermeng met al die gewone metale, buiten met yster en platinum, om allooie te vorm wat as amalgame bekend staan. In een proses waarin goud en silwer uit hul ertse onttrek word, word hierdie metale met kwik vermeng, waarna die kwik weer deur middel van distillasie verwyder word.

6) Kwik vorm ook belangrike verbindings wat in die handel beskikbaar is, soos die bekende Mercurochrome, wat ’n besonderse rol in die geneeskunde speel.

 Nadele van kwik:

KWIK is giftig en uiters gevaarlik as ’n damp en in die vorm van sy soute wat in water oplos. Kwikdampe en water-oplosbare kwiksoute vreet naamlik die membrane van die menslike liggaam.

Chroniese kwikvergiftiging, wat plaasvind wanneer klein hoeveelhede kwik herhaaldelik oor ’n lang tydperk ingeneem word, veroorsaak onomkeerbare skade aan die brein, lewer en niere.

Weens toenemende waterbesoedeling is beduidende hoeveelhede kwik al in sekere soorte visse gevind, wat tot groot besorgdheid gelei het omdat die metaal so duidelik onbeheerd in die omgewing gestort word.

Klik hier om terug te keer na die Laslappie-bladwyser

Klik hier om terug te keer na die inhoudsblad