’n Laslappie van Mieliestronk

LODEWYK XIV (die Sonkoning)

REGS: Lodewyk XIV van Frankryk soos in 1701 geskilder deur Hyacinthe Rigaud.

Kopiereg verstreke vanweë ouderdom

LODEWYK XIV, seun van Anna van Oostenryk en Lodewyk XIII, bestyg die Franse troon in 1643 op ’n baie jeugdige vyf jaar. Die land word namens hom deur sy ma regeer, met die hulp van die troonadviseur kardinaal Jules Mazarin, wat die grondslag vir Lodewyk XIV se bewind lê. Toe die kardinaal in 1661 sterf, neem Lodewyk alle magte oor.

Die begin van sy bewind word deur verskeie gebiedsverowerings gekenmerk. Aan die einde van die Spaanse Suksessie-oorlog (1701-1714) was Frankryk egter geruïneer en verkry Engeland die beheer oor Europa.

Lodewyk XIV was ook bekend as Le Roi Soleil (die Sonkoning). Geskiedkundiges verskil egter of sy bewind werklik so roemryk was as wat dikwels gesê word.

In 1682 verskuif Lodewyk XIV die koninklike hof na Versailles, die manifieke nuwe paleis buite Parys. Die koninklike paleis is deur pragtige tuine, fonteine, watervalle en weerkaatsende poele omring. Die lewe aan die hof was rojaal, met baie danspartye en opelug-feestelikhede.

REGS: ’n Ou skildery van 1722 van Versailles, sowat sewe jaar ná Lodewyk XIV se dood.

Kopiereg verstreke vanweë ouderdom

Belangrike jaartalle in die lewe van Lodewyk XIV en sy sterfjaar:

1638—Gebore vir Lodewyk XIII en Anna van Oostenryk.

1643—Volg sy pa as koning op, met sy ma as die regentes.

1661—Mazarin sterf en Lodewyk neem alle magte oor.

1682—Die koninklike hof verskuif na Versailles.

1701—Spaanse Suksessie-oorlog.

1715—Lodewyk sterf in Versailles.

BO: Die skouspelagtige ou koninklike hof van Versailles is vandag steeds ’n groot toeriste-attraksie.

Foto: BIGFOTO. COM / Free pic

Absolutisme (onbeperkte alleenheerskappy): Toe Lodewyk XIV koning word, beset hy sy troon met absolute mag. Daarna is hy l'etat, c'est moi (''die staat, dit is ek''), die alleenheerser in Frankryk, hoewel dit te betwyfel is of hy ooit self daardie woorde gebruik het wat nou algemeen aan hom toegedig word. Party bronne sê hy het as ’n groot koning geregeer, ander dat sy swak bestuur en spandabelrigheid ’n finansiële krisis veroorsaak het—dat die skatkis van Frankryk leeg was toe hy dood is. Die ontevredenheid van die mense sou aan die einde van daardie eeu tot die Franse Revolusie lei.

Klik hier om terug te keer na die Laslappie-bladwyser

Klik hier om terug te keer na die inhoudsblad