’n Laslappie van Mieliestronk

METAMORFOSE
of gedaanteverwisseling
(volkome en onvolkome)

GEDAANTEVERWISSELING, of metamorfose, is in die biologie die verandering wat insekte en sekere ander diere in hul lewenskringloop ondergaan.

By insekte vind volkome gedaanteverwisseling by die meeste tweevlerkiges, by miere en vlinders plaas:

eier > larwe of maaier of ruspe > papie > volwassene

In die eerste fase vorm ’n embrio binne-in ’n eier. Wanneer die eier uitbroei, verskyn ’n larwe, wat op sy beurt in ’n papie verander. Aan die einde van die papiestadium kruip die volwasse insek uit die papie. Ander diere benewens insekte wat op hierdie manier ontwikkel, sluit baie soorte visse en weekdiere in.

Paddas ondergaan ’n ander soort volkome gedaanteverwisseling. Uit die eier verskyn ’n paddavissie, wat in die water lewe, met kieue asemhaal en ’n stert het. Namate die paddavis groei, ontwikkel longe en pote, en die kieue en stert word in die liggaam opgeneem. Uiteindelik verlaat die volwasse padda die water en lewe hoofsaaklik op die droë grond.

Onvolkome gedaanteverwisseling
(eier  >  nimf  > volwassene)
word onder meer deur termiete, naaldekokers en deur die halfvlerkiges ondergaan. Die nimf lyk gewoonlik wesenlik soos die volwassene en groei geleidelik deur vervelling of deur van sy buitedop ontslae te raak. Daar is nie ’n papiestadium nie.

Klik hier om terug te keer na die Laslappie-bladwyser

Klik hier om terug te keer na die inhoudsblad