Rekenaartoestelle
Die basiese stelsels

Invoertoestelle

 
Toetsbord

Voordeel: Gegrond op die toetsbord van die tikmasjien, is die rekenaartoetsbord een van die onontbeerlike komponente van enige moderne rekenaar. Soos die sintuiglike organe van ’n mens word inligting hier ontvang en na die “brein” vervoer.

Nadeel: Een nadeel van die toetsbord is dat dit onderworpe kan wees aan vinnige slytasie of makliker kan “breek” as wat baie rekenaargebruikers geneig sou wees om te vermoed. Selfs as iets soos vrugtesap per ongeluk daarop gemors word, kan die taaiigheid onder die toetse die toetsbord spoedig onbruikbaar maak.  Dit kan ook nie harde vingerslae so “geduldig” verduur soos die tikmasjiene van weleer nie (altans, só vertel die ouer mense wat sowel die era van die tikmasjien as dié van die rekenaar belewe het).

Prys: Van omtrent R60-00 tot sowat R250-00 (vir die een op die foto) en meer.

Muise

BENEWENS toetsborde is muise die ander voerders van inligting na die rekenaar—deurdat hulle die beweeglike muispyltjie op die rekenaarskerm rondstuur en die rekenaar by wyse van klikke op ikone of skakels tot verskillende aksies aktiveer.

Balmuis:

Voordeel: Hierdie soort muis, wat so gemaklik op ’n muismatjie rondgestoot word en deur middel van ’n bewegende balletjie onderaan sy “buik” werk, is die ou staatmaker wat heelwat minder kos as die nuwerwetser soorte.

Nadeel: Die balletjie moet gereeld skoongemaak word, want allerhande wolletjies en klein afvalstowwe (soos dié wat van slytende klere afskawe) kan die balletjie kort-kort taamlik steeks maak, tot groot irritasie van die gebruiker.

Prys: ___________

Optiese muis:

Voordeel: Omdat die optiese muis die handbewegings van die gebruiker lees deur middel van sensitiewe ligstrale pleks van ’n balletjie, kan rafels en vuilighede dit nie laat stagneer nie en is selfs ’n muismatjie nie nodig nie (dit werk byvoorbeeld ewe goed op die lessenaar se blad—of self op ’n mens se skoot of knie!)

Nadeel: Optiese muise kan in die reël nie op blink of deurskynende voorwerpe funksioneer nie, insluitende sekere soorte muismatjies, met die gevolg dat die muispyltjie op die rekenaarskerm soms koersloos ronddobber.

Prys: ___________

Koordlose muis:

Voordeel: Elke rekenaargebruiker ken die frustasie van die “stert” van die muis wat alewig in die pad is! Met die stert word natuurlik die koord bedoel wat die apparaat met die rekenaar verbind. Die voordeel van die nuwerwetse koordlose muis—wat ’n sendertjie bevat en verder werk met ’n apparte ontvangertjie wat by die UBS-poort ingeprop word—lê voor die hand.

Nadeel: Pleks van een apparaat vir die werking van die muis is daar nou twee... en die een kan nie sonder die ander een funksioneer nie. As enigeen van die twee dus onklaar raak, sit die rekenaargebruiker met ’n probleem.

Prys: Die stel op die foto kos nagenoeg R279.

Afvoertoestelle

Drukker

Voordeel: Teks, foto’s en ander grafika kan deesdae met verstommende helderheid gereproduseer word met die verskillende betreklik bekosbare inkstraal-drukkers op die mark. Baiemaal vergelyk die produkte goed met professionele drukwerk.

Nadeel: Die kasette met ink wat deur sulke drukkers gebruik word, is peperduur. Daar is wel generiese inkkasette op die mark, maar die gehalte word in die reël nie gewaarborg soos die ware Jakob nie. Sulke verdagte soorte ink kan selfs ’n rekenaar beskadig (hoewel daar kol-kol redelik betroubare goedkoop soorte is wat blykbaar uit China kom).

Prys: Wisselend, van minder as duisend rand tot R1500-00 en meer.

  
Luidspreker

Voordeel: Met luidsprekers (lank nie almal so swierig soos die verligte luidsprekerstelsel op die foto nie) word klank uit die rekenaar afgevoer.  ’n Oneindige hoeveelheid musiekstukke kan sodoende deur middel van rekenaars gespeel word, hetsy deur middel van CD’s of programme en musiekdata op die rekenaar se hardeskyf.

Nadeel: Rekenaarklanke is bes moontlik dikwels nie so sonoor en welluidend soos dié van goeie musiekspelers wat geen ander funksie het buiten om musiek te speel nie.

Prys: Die luidsprekerstel op die foto kos 79-99 dollar in Amerika (in rande omgereken, is dit ongeveer R585-00, maar dit sal feitlik seker hier nog meer as dit kos, want die invoerder sal ook sy deel eis).

Bergingstelsels

Hardeskyf

Voordeel: In die baie ou rekenaars was daar nie noemenswaardige hardeskywe nie en moes inligting en programme met sogenaamde slapskywe (floppy discs") in- en afgevoer word. Oor die jare heen het die hardeskywe so gesofistikeerd geraak dat hulle die data en programme van letterlik miljoene slapskywe kan berg. Die voordeel is dat so ’n bielie-skyf binne-in die rekenaar gehuisves word as ’n integrerende deel van die apparatuur.

Nadeel: As hierdie apparaat met soveel data en programme onklaar raak—soos ongelukkig nog te dikwels gebeur—sit die gebruiker met die hande in die hare indien hy of sy nie kopieë elders geberg het nie (sogenaamde “backups” gemaak het nie).

Prys: ___________

Foto: Verkleining van veel groter foto van IBM-hardeskyf (met die metaalbedekking verwyder)
deur Dave Indech,
wat gebruik daarvan vergun in die Engelse weergawe van die Wikipedia-ensiklopedie op die wêreldwye web ingevolge die GNU Free Documentation License, weergawe 1,2 of enige latere weergawe wat deur die Free Software Foundation gepubliseer word; onderworpe aan afstanddoening van aanspreeklikheid.

    
Kompakskyf (CD)

Voordeel: ’n CD werk met laserstrale wat inligting (en natuurlik ook musiek) op die blink skyf inbrand, met behulp van spesiale apparatuur en programmatuur. Op ’n standaard-CD kan data van tot 750 Mb geberg word... ’n enorme klomp inligting wat byvoorbeeld ’n ensiklopedie kan bevat wat ’n hele boekrak sou gevul het as dit gedrukte materiaal was. Jy kan dus selfs ’n ensiklopedie in jou sak ronddra!

Nadeel: Een nadeel van die CD is dat dit betreklik maklik beskadig kan raak. Jy kan per ongeluk op die skoolterrein val met een in jou hand en in ’n kol gruis en klippe beland wat jou hele ensiklopedie in ’n oomblik uitwis!

Prys: R3 en meer vir ’n blanko CD (een waarop geen inligting nog geberg is nie).

Klik hier om terug te keer na die inhoudsblad