Skrywers in Afrikaans 

Etienne van Heerden

•  Die teks en foto hieronder is met spesiale vergunning oorgeneem uit die webtuiste van NB Uitgewers. Die webtuiste bevat nog ’n ryke verskeidenheid van inligtende artikels oor die lewe en werk van ander skrywers. Besoek gerus die webtuiste van NB Uitgewers deur hier te klik

Etienne van HeerdenBiografiese inligting

ETIENNE ROCHÉ VAN HEERDEN is op 3 Desember 1954 in Johannesburg gebore. Hy word groot in die Oos-Kaap en Stellenbosch waar hy aan Paul Roos Gimnasium matrikuleer. Ná ’n jaar in die Suid-Afrikaanse vloot studeer hy aan die Universiteit van Stellenbosch en behaal die grade B.A. (Regte), LL.B. en honneurs (cum laude) in Afrikaans en Nederlands, ’n meestersgraad aan die Universiteit van die Witwatersrand en ’n Ph.D. aan Rhodes Universiteit. Hy werk onder meer as prokureur, in die reklamebedryf en daarna ook as dosent aan die Universiteit van Zoeloeland en Rhodes Universiteit.

Etienne debuteer in 1978 met die jeugroman Matoli, en as digter in 1981 (saam met André le Roux du Toit, Peter Snyders en Daniel Hugo) met Brekfis met vier. Hy ontvang die Eugène Marais-prys in 1984 vir sy kortverhaalbundel My Kubaan. In 1986 verskyn sy roman Toorberg, wat met die Hertzog-, CNA-, AKTV-, en WA Hofmeyr-prys bekroon word. Hy word daarna ook bekend vir romans soos Die stoetmeester (1993), Die swye van Mario Salviati (2000), In stede van die liefde (2005) en 30 nagte in Amsterdam (2008).

Hy is die afgelope twee dekades reeds betrokke by die doseer van letterkunde, literêre teorie en kreatiewe skryfwerk. Tans is hy professor verbonde aan die Universiteit van Kaapstad waar hy benewens kreatiewe skryfwerk-begeleiding ook gemoeid is met die doseer van literêre teorie, mediastudies en Suid-Afrikaanse en Nederlandse letterkunde.

Het jy geweet?

     
  • Etienne is onder meer ’n Honorary Fellow aan die Universiteit van Iowa in Amerika en “Writer in Residence” aan die Universiteite van Antwerpen en Leiden.
  • Hy was in die tagtigerjare ook een van die Afrikaanse skrywers wat 'n ontmoeting met ANC-lede by die Victoria-waterval in Zimbabwe gehad het.
  • Hy is die stigtersredakteur van die kulturele webruimte LitNet.
  • Toorberg, die berg, is op die Van Heerden-familieplaas Doornbosch geleë, op die grens tussen Graaff-Reinet en Murraysburg in die Oos-Kaap.
  • Hy is sedert sy geboorte blind in sy regteroog (’n kongeniale katarak).
  • Die Engelse vertaling van sy roman Die stoetmeester onder die titel Leap Year is genomineer vir die Internasionale Dublin Literêre Toekenning.

Boeke steeds in druk

Die stoetmeester, Tafelberg (2008)
Asbesmiddag, Tafelberg (2007)
In stede van die liefde, Tafelberg (2005)
Toorberg, Tafelberg (2003)

Bekronings

ATKV-prosaprys (2005) – In stede van die liefde
ATKV-prosaprys (1994) – Die stoetmeester
ATKV-prosaprys (1989) – Liegfabriek
ATKV-prosaprys (1987) – Toorberg

CNA-prys (1989) – Liegfabriek
CNA-prys (1986) – Toorberg

Eugène Marais-prys (1984) – My Kubaan

Hertzogprys vir prosa (2010) – 30 Nagte in Amsterdam Hertzogprys vir prosa (1989) – Toorberg

WA Hofmeyr-prys (2006) – In stede van die liefde
WA Hofmeyr-prys (1987) – Toorberg

M-Net-prys vir prosa (2008) – Asbesmiddag
M-Net-prys vir prosa (2001) – Die swye van Mario Salviati

Rapport-prys vir prosa (1992) – Casspirs en Campari’s

Lys van publikasies

Prosa: roman
1978 Matoli, Perskor-Uitgewery
1984 Om te awol: ’n roman, Tafelberg
1986 Toorberg, Tafelberg.
1991 Casspirs en Campari’s: ’n historiese entertainment, Tafelberg
1993 Die stoetmeester, Tafelberg
1996 Kikoejoe, Tafelberg
2000 Die swye van Mario Salviati: ’n roman, Tafelberg
2005 In stede van die liefde, Tafelberg
2007 Asbesmiddag, Tafelberg
2008 30 nagte in Amsterdam, Tafelberg

Prosa: kortverhale
1983 My Kubaan, Tafelberg
1988 Liegfabriek, Tafelberg

Poësie
1981 Obiter dictum, Perskor
1981 Brekfis met vier (saam met André le Roux du Toit, Daniel Hugo, Peter Snyders), Skoppensboer
1987 Die laaste kreef, Tafelberg

Samesteller
1989 Miskien sal ek die wingerd prys: ryme en gedigte oor drank (saam met Daniel Hugo), Tafelberg
1999 Die rooi roman: interaktiewe roman (red.), Human & Rousseau
1999 Die mooiste liefde is verby (samesteller), Tafelberg
2001 Briewe deur die lug: LitNet / Taalsekretariaat-skrywersberaad 2000, Tafelberg
2003 Die Omstrede God, African Sun Media

Essays
2004 Die stilte na die boek: kitsessays, Tafelberg

Kabaret
1998 Lied van die boeings: ’n kabaret, Tafelberg

Literêre teorie
1997 Postmodernisme en prosa: vertelstrategieë in vyf verhale van Abraham H. de Vries, Human & Rousseau

Vertalings

Toorberg (1986)
Engels (Ancestral Voices, 1989), Nederlands (De betoverde berg, 1991), Frans, Duits, Deens, Noorweegs, Fins, Sweeds

Liegfabriek (1988)
Engels (Mad dog and other stories, 1992), Hebreeus en Nederlands (De witte aap, 1992)

Casspirs en Campari’s (1991)
Engels (Casspirs and Camparis) en Nederlands

Die stoetmeester (1993)
Engels (Leap Year, 1997) en Nederlands

Kikoejoe (1996)
Engels (Kikuju, 1998) en Nederlands

Die swye van Mario Salviati (2000)
Engels (The Long Silence of Mario Salviati), Nederlands (Het zwijgen van Mario Salviati), Duits (Das Lange Schweigen), Frans, Grieks en Russies

In stede van die liefde (2005)
Nederlands (In de plaats van liefde, 2006)

Uittreksels uit resensies

30 Nagte in Amsterdam is ’n gekonsentreerde, energieke roman deur ’n belangrike Suid-Afrikaanse skrywer. Dit sal literêre besinning oor Van Heerden se werk voed, maar ook die leser op soek na ’n goeie storie vir die somervakansie tevrede stel. Koop dit, lees dit; jy sal nie spyt wees nie.” – Desmond Painter, Die Burger (2008)

“Van Heerden self put ryklik uit sy groot verbeeldingskrag. Hy het ’n aanvoeling vir die karnaval-agtige en tragi-komiese aspekte van die menslike lewe wat Asbesmiddag baie genietlik maak.” – Etienne Britz, Die Burger (2007)

“Dit is dus ’n roman waarmee Van Heerden getrou bly aan homself én homself vernuwe. Hy skryf hier met die rustige selfvertroue van iemand wat besig is om een van die sterkste romansiers in Afrikaans te word.” – Louise Viljoen oor Die swye van Mario Salviati, Rapport (2000)

Toorberg is ’n ambisieuse roman en dit strek tot die skrywer se krediet dat hy die veelvoud intriges, karakters en motiewe met groot dissipline tot die einde deurvoer. […]Toorberg is ’n indrukwekkende roman en sonder twyfel ’n belangrike bydrae tot die Afrikaanse prosa.” – Gunther Pakendorf, Die Burger (1986)


Klik hier vir die inhoudsblad van Skrywers in Afrikaans


Klik hier om terug te keer na die inhoudsblad van die Mieliestronk-werf