Laslappie: Sewe wonders van die Oudheid

’n Laslappie van Mieliestronk
7 WONDERS VAN DIE OUDHEID Hulle is deur die antieke Grieke uitgesonder as die sewe wonders van die wêreld van destyds. Hoe die meeste werklik gelyk het, bly ’n ope vraag, maar veel latere kunstenaarsvoorstellings is skouspelagtig...	1. Die Kolos van Rhodos
2. Die Hangende Tuine van Babilon	3. Die Mausoleum van Halikamassos
4. Die Tempel van Diana by Efese	5. Die standbeeld van Zeus by Olimpië
6. Die piramides van Egipte	7. Die vuurtoring (Pharos) van Alexandrië
BO: Die sestiende eeuse Nederlandse kunstenaar Martin Heemskerck (1498-1574) was verantwoordelik vir fantastiese voorstellings van die ou Grieke se wêreldwonders. Indien die bronne korrek geïntrepeteer word, is die vyf met die hand ingekleurde gravures hierbo deur homself geskep, terwyl die gravure van die standbeeld van Zeus in 1572 deur Philippe Galle gemaak is volgens ’n tekening deur Heemskerk. Die piramide (nommer 6) is in die negentiende eeu afgeneem en die beeld is volgens ’n vroeë praktiese fotografiese proses ontwikkel (vermoedelik “daguerreotype”, wat in 1839 bekend gestel is). Die piramides is die enigste van die sewe wonders wat tot vandag toe betreklik ongeskonde behoue gebly het. Kopiereg op die gravures en ou fotografiese beeld het vanweë verjaring verstryk en hulle word gevolglik vandag as openbare besit (“in the public domain”) beskou
VAN die sewe wêreldwonders van die Oudheid het jy moontlik al meermale gehoor. Maar wie het dan in daardie tyd besluit watter bouwerke nou juis tot “wonders” verhef moes word? Dit was die Grieke van weleer. Hulle was geesdriftige reisigers. En die eerste lyste van die sogenaamde wonders van die antieke wêreld het blykbaar verskyn in die “reisgidsboeke” van die Hellenistiese Tydperk (van 323 tot 30 v.C.). Dit is egter die lys van sewe “outentieke” wonders deur Philo van Bisantium wat deur latere skrywers aanvaar is as die korrekte Griekse beskouing van destyds. Die enigste van die sewe wonders wat tot vandag toe betreklik ongeskonde behoue gebly het, is die piramides. Maar ’n aantal jare gelede het die herwinning van brokstukke van die vuurtoring, of Pharos, van Alexandrië ook groot opspraak gewek. Die oorblyfsels is deur ’n ekspedisie van Franse argeoloë uit die see gehaal.
Klik hier om terug te keer na die Laslappie-bladwyser
Klik hier om terug te keer na die inhoudsblad