Die Mieliestronk-werfwerf vir skoolprojekte—wat ook deur ’n borgskap van Sanlam gehelp word—bring graag hier hulde aan die Takalani Sesame-projek, wat danksy Sanlam se onmisbare steun reeds baanbrekerswerk gedoen het in die opvoeding van die veelvolkige jeug van Suid-Afrika...
 

Takalani Sesame
  
Sanlam se R100 miljoen-bydrae tot die opvoeding van die jeug van SA

DIT was kort voor die jongste eeuwisseling dat die wiele begin rol het, in 1997 om presies te wees.

Sesame Workshop, wêreldberoemde media-maatskappy wat hom op kinders toespits, het met die ontwikkeling van ’n opvoedkundige media-inisiatief in Suid-Afrika begin. Dit was danksy ’n skenking van die Amerikaanse agentskap vir internasionale ontwikkeling, USAID, en ’n ooreenkoms met die Suid-Afrikaanse Departement van Opvoeding.

Takalani en vigs MET die uiters ernstige invloed van MIV/vigs op die Suid-Afrikaanse bevoking lewer Takalani Sesame ook sy belangrike bydrae tot die bewusmakingsveldtog. Die projek het hom aangesluit by die Departement van Opvoeding se HIV/vigs-kurrikulum vir kinders van skoolgaande ouderdom. Die jong gehoor word naamlik in dialoë oor die siekte ingelig, onder meer deur mites te vernietig en die stigma daarom af te breek. Alles word gedoen op ’n manier wat kinders sal verstaan, soos deur die toevoeging van Khami, die heel eerste MIV-positiewe Muppet-tipe speelpop. Trouens, Takalani self is die heel eerste program nog wat die vigs-onderwerp met jong kinders aanspreek.

Die plan het getuig van durf—om ’n reeks kinderprogramme te skep wat nie net die kennis van lees en skryf en reken moes bevorder nie, maar sy gebruikers ook lewensvaardighede en nasiebou moes leer, terwyl geprobeer moes word om die rasse-ongelykhede aan te spreek wat deur die jare van apartheid geskep is.

Die gebrekkige toedrag van sake waar formele voorskoolse onderrig vir slegs een uit elke ses kinders beskikbaar is, het ’n media-insiatief des te noodsaakliker gemaak. Só het Takalani Sesame dan ontstaan.

Maar daar was een baie netelige kwessie. Alle lede van die Suid-Afrikaanse bevolking het nie toegang tot televisie nie en die kinders wat onderrig die meeste nodig het, sou steeds nie bereik kon word nie. Om hierdie probleem aan te spreek, het Sesame Workshop, met die geldelike steun van USAID, ’n unieke nuwe opvoedkundige radio-inisiatief vir kinders ontwikkel.

Tog was dit steeds nie genoeg nie. ’n Uitreiking op voetsoolvlak was nodig om ouers en kinderversorgers op te lei in die gebruik van media-gedrewe onderrig. Dit sou meebring dat die program en wat dit bied na die uithoeke van die land gebring moes word.

Om die model in werking te stel, was meer organisatoriese steun uit Suid-Afrikaanse geledere nodig. Die Suid-Afrikaanse uitsaaier SABC het toegetree om vir sowel die uitsending van die TV- as die radio-reeks te sorg. Die SABC was ’n natuurlike vennoot vanweë sy openbare mandaat om opvoedkundige klankprogramme van hoë gehalte aan jong kinders en hul versorgers te bied.

Die inisatief het die belangstelling van Sanlam gewek, wat nie slegs die spreekwoordelike stuiwer sou bygooi nie, maar inderdaad vir die grootste borgskap-pakket in sy geskiedenis sou sorg. Die maatskappy het Takalani beskou as sy hoofbydrae tot opvoeding in hierdie land en ’n waardevolle werktuig om die speelveld gelyk te maak in voorskoolse opvoeding in Suid-Afrika.

Sanlam se bydrae het verseker dat al die elemente van die projek gedek en uitgevoer kon word. Só is ’n openbare/private vennootskap gebore.

Altesame 65 televisieprogramme van ’n halfuur lank het die lig gesien wat die Departement van Opvoeding se nasionale kurrikulum en veeltalige doelstellings weerspieël het. Daarbenewens is 39 radioprogramme in vier tale geskep en in elk van die vooraf bepaalde provinsies uitgesaai. Plakkate, boekies en ander gedrukte opvoedkundige uitreikingsmateriaal het ’n geraamde 60 000 eindgebruikers bereik.

Die eerste uitsending was in Junie 2000. Die reekse, wat twee jaar lank daagliks op SABC-televisie en oor die radio uitgesaai is, is deur miljoene kinders gesien en gehoor.

Die trefkrag van die projek was so oorweldigend dat Sanlam, Sesame Workshop, USAID, die SABC en die Departement van Opvoeding weer hul kragte vir die volgende stadium saamgesnoer en nog 105 TV-programme en 500 radioprogramme geskep het. Hierdie programme is met ’n verlengde uitsaaityd tot September 2006 uitgesaai. Maar nog was het einde niet!

Daarna is aangekondig dat Sanlam sy Takalani-borgskap vir nog ’n aantal jare tot Januarie 2011 verleng het. Sanlam sal dan betrokke gewees het in die voorskoolse opvoeding van ’n hele geslag van skoolkinders.

---

Takalani-tapisserie: nog feite oor hierdie groot suksesreeks

• Sanlam se totale borgskap oor die drie seisoene bedra nagenoeg   R100 miljoen.

• Dit word tans op SABC 1 en SABC 2 gebeeldsend.

• Radio-uitsendings geskied drie maal elke week deur die grootste radiostasies in Suid-Afrika: Ukhozi FM (Zoeloe), Umhlobo Wenene (Xhosa), Thobela, Motswedeng (Sesotho) en SA FM (Engels). Uitsendings deur nog twee radiostasies, RSG (Afrikaans) en Lesedi (Sesotho) word beplan, met nog sewe wat oor die volgende aantal jare moet volg.

• Onlangse navorsing toon dat dit die gewildste opvoedkundige TV-program vir kinders in Suid-Afrika is.

• Op die World Media Festival is Takalani Sesame as die wenner van  die Intermedia globe-toekenning (goud) in die kinderafdeling aangewys. Op ’n latere byeenkoms is aangekondig dat Takalani Sesame ook die Grand Jury-toekenning ingepalm het, wat prakties daarop neerkom dat dit in sy klas die beste kinderprogram ter wêreld is!

• Sanlam het met Takalani Sesame.ook reeds die Raptor-toekenning vir die beste strategiese belegging gewen. Die Raptors word deur die Marketing Federation of Southern Africa toegeken.

• Takalani is gemik op jong kinders van tussen twee en sewe jaar oud, maar navorsing toon dat selfs hoërskoolkinders daarna kyk en dit geniet.

• ’n Baie gewilde Takalani-strokiesprent verskyn weekliks in Afrikaans in Rapport Tydskrif en word ook in vier verskillende tale in die tydskrif Bona gepubliseer.